印尼餐廳除咗尖東好時，仲有間觀塘好運，連經常出入觀塘的男友都未聽過。
餐牌得字無相，睇得明D字又唔知其實係乜。最終由店員協助下叫咗個印尼黃錦飯*，即雜錦黃薑飯，係呢度的推介，有印尼炸雞、巴東牛肉、半隻蛋同芽菜、青瓜同甜脆花生等配菜。黃薑飯色香味俱全，而且炒得夠乾身，非常好食。巴東牛肉肉質軟腍，椰味香濃，非常入味，不過都幾辣下。
印尼黃錦飯
食得印尼菜，點少得沙嗲呢？因為無得互mix的關係，揀咗半打沙嗲羊肉。炭燒羊肉肉質鬆化軟嫩，加上少少羊脂同點點羊羶，香口惹味，沙嗲醬夠哂椰香，不過食慣有花生粒粒，呢度就無。
沙嗲羊肉
另外，叫咗個印尼炸雞（擺明男友揀的），由於本人對印尼炸雞無咩概念，以為同平時普通炸雞差唔多，但原來印尼版本係比較deep fried，deep到有點過份乾身同「鞋」身，唔太啱我口味。
印尼炸雞
亦無諗過印尼版的龍眼冰同一向飲開泰式個隻係咁唔同！本來杯龍眼冰係透明，底部有D綠色糖水，手多多的我攪下攪下之後，成杯變咗綠色，我個人係比較驚D有色素的飲品。飲咗一啖之後我已經唔想再飲，有陣好濃好濃的甜味，唔係話勁甜，但個甜味好濃同好熟但一時諗唔到係咩，後來係門口櫥窗見到擺哂一支支syrup，先知原來係melon味。但係我明明叫龍眼冰，點解要加蜜瓜糖水呢？印尼風味既野我真係識條鐵…
龍眼冰
最後男友叫咗個椰汁黑糯米，椰汁香甜，黑糯米夠哂煙韌，好食。
椰汁黑糯米
賣單時我同男友咁啱唔夠現金，又無得比卡，加加埋埋仲爭廿蚊，印尼華僑老闆娘叫我地得閒行開先過來比返，話無所謂喇，搞到我地勁唔好意思，即刻走去㩒機。隔咗10分鐘返去比錢，佢竟然話無諗過我地真係返轉頭，舊區小店真係充滿人情味∼其實見到有唔少人幫襯，而且係印尼人開舖應該係幾唔錯，可能咁啱揀個d唔啱口味喇。
好運印尼餐廳
觀塘通明街46號地舖* 推介菜式︰印尼黃錦飯
其他連結︰
ABOUT THE AUTHOR
Hello We are OddThemes, Our name came from the fact that we are UNIQUE. We specialize in designing premium looking fully customizable highly responsive blogger templates. We at OddThemes do carry a philosophy that: Nothing Is Impossible
0 意見:
Post a Comment